მოგწონთ ნეოფარმის პრეპარატები?
ძალიან კარგია
უკეთესი ჯობია
არ მომწონს
საშინელებაა
» შედეგები
     
ნეოციდი #20 ტაბ (საღეჭი)

ანტაციდური საშუალება


წამლის ფორმა: საღეჭი ტაბლეტები.

შემადგენლობა:

აქტიური სუბსტანცია:
 კალციუმის კარბონატი 680მგ;
მაგნიუმის კარბონატი 80მგ.
დამხმარე ნივთიერებები:

 შაქარი, ნატრიუმის საქარინატი, მაგნიუმის სტეარატი, ტალკი, პოლივინილპიროლიდონი, ჟელატინი, სიმინდის სახამებელი, პიტნის ზეთი, ლიმონის არომატიზატორი.


ფარმაკოლოგიური მოქმედება:

,,ნეოციდი” ანტაციდური და გასტროპროტექტული მოქმედების მქონე ფარმაკოლოგიური საშუალებაა. პრეპარატის აქტიური კომპონენტები - კალციუმის და მაგნიუმის კარბონატი კუჭში მოხვედრისას ქიმიურ რეაქციაში შედის კუჭის წვენის მარილმჟავასთან, ანეიტრალებს მას კალციუმისა და მაგნიუმის ხსნადი მარილებისა და წყლის წარმოქმნით. მაგნიუმის ზემოქმედებით იზრდება ლორწოს წარმოქმნა, რაც განაპირობებს კუჭის უჯრედების დაცვას მარილმჟავას მავნე ზემოქმედებისაგან. კუჭის მომატებული მჟავიანობისა და ტკივილის დროს ,,ნეოციდი” ახდენს სწრაფ და გახანგრძლივებულ თერაპიულ მოქმედებას.

ფარმაკოკინეტიკა: პრეპარატის ეფექტი ვლინდება მიღებიდან 3-5 წთ-ის განმავლობაში, რაც განპირობებულია ტაბლეტების კარგი ხსნადობითა და კალციუმის მაღალი შემცველობით.
კალციუმისა და მაგნიუმის აბსორბციის ხარისხი დამოკიდებულია მიღებულ დოზაზე. აბსორბციის მაქსიმალური დონე კალციუმისთვის შეადგენს 10%-ს,  მაგნიუმისთვის - 15-20%. შეწოვილი კალციუმისა და მაგნიუმის მცირე რაოდენობა გამოიყოფა თირკმელებით. თირკმლის ფუნქციის დარღვევის შემთხვევაში ექსკრეცია მცირდება და შეიძლება გაიზარდოს კალციუმის და მაგნიუმის დონე პლაზმაში. კუჭის წვენთან ურთიერთქმედების შედეგად მიღებული კალციუმისა და მაგნიუმის ხსნადი მარილები ნაწლავში წარმოქმნიან უხსნად ნაერთებს, რომლებიც გამოიყოფა ფეკალიებთან ერთად.  

ჩვენებები:
• მწვავე და ქრონიკული გასტრიტი კუჭის მომატებული და ნორმალური სეკრეტორული ფუქციით (გამწვავების ფაზაში);
• კუჭისა და თორმეტგოჯა ნაწლავის წყლულოვანი დაავადება (გამწვავების ფაზაში);
• მწვავე დუოდენიტი;
• კუჭ-ნაწლავის ტრაქტის ლორწოვანი გარსის ეროზიები;
• გულძმარვა, ბოყინი, კუჭის არეში ტკივილები, რომელიც გამოწვეულია სპირტის, ნიკოტინის, ყავის ჭარბი მოხმარებით, წამლების არასწორი მიღებითა და დიეტაში დაშვებული შეცდომებით.

მიღების წესი და დოზირება:
მოზრდილებში და 12 წელზე უფროსი ასაკის ბავშვებში, თუ ექიმის მიერ არ არის სხვა დანიშნულება, მიიღება 1-2 ტაბლეტი მჟავიანობასთან დაკავშირებული სიმპტომების გამოვლენისას: ტაბლეტი უნდა დაიღეჭოს ან გაჩერდეს პირის ღრუში სრულ გაწოვამდე.
აუცილებლობის შემთხვევაში შეიძლება პრეპარატის განმეორებით მიღება 2 საათის შემდეგ.
მაქსიმალური სადღეღამისო დოზა შეადგენს 16 ტაბლეტს.

განსაკუთრებული მითითებები:
პრეპარატის გამოყენება არ არის რეკომენდირებული ხანგრძლივად.
შაქრიანი დიაბეტით დაავადებულთათვის პრეპარატის დანიშვნისას აუცილებელია იმის გათვალისწინება, რომ ,,ნეოციდი” შეიცავს 61მგ შაქარს.  

გვერდითი მოვლენები: რეკომენდირებული დოზებით მიღებისას პრეპარატი კარგად გადაიტანება, თუმცა შესაძლოა განვითარდეს შემდეგი გვერდითი მოვლენები: ალერგიული რეაქციები, დიარეა.
პაციენტებში თირკმლის ფუნქციის მძიმე დარღვევით პრეპარატის ხანგრძლივმა გამოყენებამ შესაძლოა გამოიწვიოს ჰიპერკალცემიისა და ჰიპერმაგნემიის განვითარება.

უკუჩვენება:
• მომატებული მგრძნობელობა პრეპარატში შემავალი კომპონენტების მიმართ;
• თირკმელების მწვავე უკმარისობა;
• ჰიპერკალციემია;

ორსულობა და ლაქტაციის პერიოდი: პრეპარატის გამოყენება ორსულობისა და ლაქტაციის პერიოდში შესაძლებელია ექიმის დანიშნულებით. რეკომენდებული დოზებით მიღება არ უქმნის საფრთხეს ნაყოფისა და ახალშობილის ჯანმრთელობას.

ზემოქმედება ავტოტრანსპორტისა და მექანიზმების მართვის უნარზე: პრეპარატის მიღება გავლენას არ ახდენს ავტოტრანსპორტისა და მექანიზმების მართვის უნარზე.

ურთიერთქმედება სხვა სამკურნალო საშუალებებთან: ერთდროული მიღებისას ,,ნეოციდ”-მა  შეიძლება შეცვალოს სხვა სამკურნალო საშუალებების აბსორბციის სიჩქარე და კონცენტრაცია სისხლის პლაზმაში. ამიტომ, რეკომენდირებულია სხვა პრეპარატების მიღება მოხდეს 1-2 საათიანი ინტერვალით.
ერთდროული მიღებისას ,,ნეოციდი” ამცირებს ინდომეტაცინის, სალიცილატების, H2-ჰისტამინობლოკატორების, 
b-ადრენობლოკატორების, ტეტრაციკლინის ჯგუფის ანტიბიოტიკების, რკინის შემცველი პრეპარატების აბსორბციას. აძლიერებს სულფადიაზინის, ლევოდოფას, აცეტილსალიცილის მჟავას მოქმედებას.

დოზის გადაჭარბება: პრეპარატის დიდი დოზებით ხანგრძლივმა გამოყენებამ პაციენტებში, რომლებსაც დარღვეული აქვთ თირკმლის ფუნქცია შეიძლება გამოიწვიოს ჰიპერკალცემიის, ჰიპერმაგნემიის, ალკალოზის განვითარება, რაც ვლინდება გულისრევით, ღებინებით, კუნთების სისუსტით.
აღნიშნულ შემთხვევაში პრეპარატის მიღება უნდა  შეწყდეს. ნაჩვენებია სიმპტომური მკურნალობა. სპეციფიკური ანტიდოტი არ არსებობს.

გამოშვების ფორმა: 
პირველადი შეფუთვა:10 ტაბლეტი ბლისტერზე. 
მეორეული შეფუთვა: 2 ბლისტერი მუყაოს კოლოფში ინსტრუქციასთან ერთად.

ვარგისიანობის ვადა: 3 წელი.

ვარგისიანობის ვადის ამოწურვის შემდეგ ან ვიზუალური დათვალიერებისას აღმოჩენილი დეფექტების შემთხვევაში პრეპარატის გამოყენება დაუშვებელია.
 
შენახვის პირობები:
ინახება მშრალ, სინათლისაგან დაცულ და ბავშვებისთვის მიუწვდომელ ადგილზე, 15-25
°C ტემპერატურის პირობებში.

აფთიაქიდან გაცემის წესი: ფარმაცევტული პროდუქტის ჯგუფი III - გამოყენება შესაძლებელია ექიმის დანიშნულების გარეშე ინსტრუქციის შესაბამისად. 

 



"
Copyright (c) 2010 NEOPHARMI+ LTD - All Rights Reserved