ფოლის მჟავა – 400მკგ №60 ტაბლეტი
ათქ კოდი: B03BB01.
ფარმაკოლოგიური ჯგუფი: ვიტამინური პრეპარატი.
წამლის ფორმა: ტაბლეტები.
აღწერა: ღია ყვითელი ფერის ტაბლეტები. დასაშვებია მუქი შეფერილობის ჩანართების არსებობა;
ერთი ტაბლეტის შედგენილობა: ფოლის მჟავა: 0,4მგ (400მკგ);
დამხმარე ნივთიერებები: ლაქტოზა, პოლივინილპიროლიდონი, კალციუმის სტეარატი, სახამებელი, ტალკი.
ფარმაკოლოგიური მოქმედება:
ფოლის მჟავა შედის B ვიტამინების ჯგუფში (В9). ფოლის მჟავა ორგანიზმში მეტაბოლიზდება ტეტრაჰიდროფოლის მჟავამდე. იგი წარმოადგენს კოფერმენტს, რომელიც აუცილებელია მეგალობლასტების ნორმალური მომწიფებისა და ნორმობლასტების წარმოქმნისთვის. ფოლის მჟავა ასტიმულირებს ერითროპოეზს, მონაწილეობს ამინომჟავების სინთეზში, ნუკლეინის მჟავების, პურინების, პირიმიდინების, ქოლინის ცვლაში.
ფარმაკოკინეტიკა:
პერორალური მიღებისას სრულად შეიწოვება თორმეტგოჯა და წვრილი ნაწლავის პროქსიმალური ნაწილიდან. მიღებული დოზის 98,5% ისაზღვრება სისხლში 3-6 საათის შემდეგ. ნაწლავებში შეწოვის წინ ფოლის მჟავა განიცდის აღდგენას ფერმენტის (დეჰიდროფოლატრედუქტაზას) მეშვეობით. ფოლის მჟავას მეტაბოლიზმი და დეპონირება ხდება ღვიძლში. მიღებული დოზის 50% ელიმინირდება შარდთან ერთად.
ჩვენება:
• ანემიის მკურნალობა და პროფილაქტიკა ორსულობის და ლაქტაციის პერიოდში;
• ანემია, გამოწვეული ფოლის მჟავას დეფიციტით.
უკუჩვენება:
მომატებული მგრძნობელობა ფოლის მჟავას მიმართ, პერნიციოზული ანემია, კობალამინის დეფიციტი, ბავშვთა ასაკი.
დოზირება და მიღების წესი: მიიღება პერორალურად საკვების მიღების შემდეგ.
ფოლის მჟავას დეფიციტის დროს ინიშნება 400მკგ (1 ტაბლეტი) / დღეში.
ნაყოფის ნერვული მილის დეფექტების განვითარების პროფილაქტიკისთვის ფეხმძიმობის პირველ ტრიმესტრში ფოლის მჟავა ინიშნება დოზით – 400 – 800 მკგ (1-2 ტაბლეტი) / დღეში.
გვერდითი მოვლენები:
ალერგიული რეაქციები: გამონაყარი კანზე, ქავილი, ბრონქოსპაზმი, ერითემა, ცხელება.
კუჭ-ნაწლავის ტრაქტის მხრივ: გულისრევა, მუცლის შებერვა, სიმწარის შეგრძნება პირში, ანორექსია.
სხვა: ხანგრძლივი გამოყენებისას შეიძლება გამოიწვიოს В12 ჰიპოვიტამინოზის განვითარება.
გაფრთხილება:
პრეპარატის დიდი დოზით ხანგრძლივმა მიღებამ შესაძლოა გამოიწვიოს სისხლში ციანოკობალამინის კონცენტრაციის შემცირება. პერნიციოზული ანემიისას ნევროლოგიური გართულებების თავიდან ასაცილებლად მიზანშეწონილია ფოლის მჟავას და ციანოკობალამინის კომბინაცია.
ორსულობა და ლაქტაცია:
ფოლის მჟავა აუცილებელია ფეხმძიმობის მოსამზადებელ პერიოდში (1-3 თვით ადრე დაგეგმილ ფეხმძიმობამდე) და ფეხმძიმობის პირველ ტრიმესტრში.
სხვა პრეპარატებთან ურთიერთქმედება:
ქლორამფენიკოლთან, ნეომიცინთან, ტეტრაციკლინთან კომბინაციაში მცირდება ფოლის მჟავას შეწოვა. ფენიტოინის, პირიმიდინის, პასკის, სულფასალაზინის, ქლორამფენიკოლის, ჰორმონალური კონტრაცეპტივების ფოლის მჟავასთან კომბინაციისას მცირდება მათი თერაპიული ეფექტი.
ჭარბი დოზირება:
დოზის გადაჭარბებას შეიძლება ჰქონდეს ადგილი ხანგრძლივი პერიოდის განმავლობაში (1-2 თვეზე მეტი ხნის მანძილზე) ფოლის მჟავას 1000მკგ–ზე მაღალი დოზებით მიღებისას დღეში, ან პრეპარატის ვიტამინურ-მინერალურ კომპლექსებთან ერთდროული მიღებისას.
გაცემის წესი: ფარმაცევტული პროდუქტის ჯგუფი III, გაიცემა ურეცეპტოდ.
ვარგისიანობის ვადა: 2 წელი.
შენახვის პირობები: ინახება 15-25ºC ტემპერატურულ პირობებში სინათლისგან დაცულ და ბავშვებისთვის მიუწვდომელ ადგილზე.
ვარგისობის ვადის ამოწურვის ან ვიზუალური დათვალიერებისას დეფექტების აღმოჩენის შემთხვევაში პრეპარატის გამოყენება დაუშვებელია.
შეფუთვა:
ფოლის მჟავა – 400მკგ (0,4მგ)
პირველადი შეფუთვა: #20 ტაბლეტი ბლისტერზე.
მეორადი შეფუთვა: 3 ბლისტერი მუყაოს კოლოფში.
